कलैयामा फागुन ९ गते देखि कलैया टि–२० मेयर कप क्रिकेट प्रतियोगिता हुने भएको छ ।

कलैया उपमहानगरपालिकाको सहयोगमा कलैया क्रिकेट क्लबले कलैया मेयर टि–२० मेयर कप क्रिकेट प्रतियोगिता आयोजना गर्न लागेको हो । हिजो कलैयामा पत्रकार सम्मेलन गरि क्लबले प्रतियोगिताका बारेमा जानकारी पनि गराएको छ । कलैयाको सिद्धेश्वर माध्यमिक विद्यालयको खेल मैदानमा सन्चालन हुने प्रतियोगितामा नेपाल र भारतका गरि ६ वटा टिमले भाग लिनेछन् ।

प्रतियोगितामा नेपालको कलैया, वीरगन्ज, चितवन र मकवानपुर तथा भारत बिहारको बेतिया र मोतिहारी क्रिकेट क्लबले भाग लिने आयोजक कलैया क्रिकेट क्लबलका अध्यक्ष तसिरुद्दिन मन्सूरले पत्रकार सम्मेलनमा जानकारी गराउनुभयो । प्रतियोगितको विजेता टिमलाई नगद ६० हजारसहित ट्रफी र उपविजेता टिमलाई नगद ३० हजारसहित ट्रफी प्रदान गरिने अध्यक्ष मन्सूरले बताउनुभयो । पत्रकार सम्मेलनमा कलैया उपमहानगरपालिकाका मेयर विनोद साहले प्रतियोगिताको विजेता र उपविजेता टिमलाई प्रदान गरिने ट्रफी सार्वजनिक गर्नुभएको थियो ।

कलैया क्रिकेट क्लबका अध्यक्ष मन्सूरको अध्यक्षता तथा कलैया उपमहानगरपालिकाका मेयर साहको प्रमुख आतिथ्यतामा भएको पत्रकार सम्मेलनमा जिल्ला क्रिकेट संघ बाराका अध्यक्ष प्रभात चौरसिया, सचिव अनिल चौगाई, कोषाध्यक्ष सुभाष जयसवाल, नगर खेलकुद विकास समितिका संयोजक एम समिउल्लाह, नगर खेलकुद विकास समितिका पूर्वअध्यक्ष दिब्यनाथ श्रेष्ठ, जटाशंकर सरार्फ, चर्चित क्रिकेटर सन्जम रेग्मी लगायतको पनि उपस्थिति थियो ।